Мәңгелек саф

Әскәрова (Салихова) Маһирә 1919 нчы елның 1 нче июлендә Саба районы Төбәк авылында туа. Гаиләдә 3 бала була. Төбәк авылында белем ала. Мәктәпне тәмамлаганнан соң Олы Кибәче авылының бик зыялы гаиләсендә тәрбияләнгән Каюм Салиховка кияүгә чыга. Алар, бергәләшеп , Саба районы Оет башлангыч мәктәбендә эшлиләр. Каюм Салихов мәктәп мөдире була, Маһирә Салихова –укытучы. Ул: “Советлар Союзы Герое Вәли Хаҗиәхмәт улы Хаҗиев та миндә укыды, бик тыйнак укучы иде”,-дип искә ала торган була.

Әсәдова Рәкыя Мәхмүт кызы 1931 елның 24 декабрендә Чукмарлы авылында туган. Туган авылында җиденче сыйныфны тәмамлагач та, колхозда эшли башлый, укуны дәвам итәргә мөмкинлек булмый. Рәкыя апаның да балачагы, яшьлек еллары меңләгән тыл ветераннарыныкы кебек үк сугыш һәм сугыштан соңгы авыр елларга туры килә. Гаиләдәге биш баланың әтиләренә сугыштан исән кайту насыйп булмый. Бу чор балаларының эшләмәгән берәр эше калды микән. Рәкыя апа да башак җыя, чүп утый, көлтә бәйли, атлы молотилкага көлтә биреп тора.

Әсәдуллин Вәлим Әсәдулла улы 1905 елда Казан губернасының Спас өязе Карамалы авылында (хәзер ТР Әлки районы) туган. Бөек Ватан сугышы ветераны. 1941 елда фронтка чакырыла. Артиллерист. Ефрейтор булып хезмәт итә. 1943нче елда Смоленскида, Орел юнәлешендә узган сугышларда катнаша, 1944 нче елда Польша, Германияне азат итүдә катнаша. Ике мәртәбә яралана: 1943нче елда Украина янында, 1945нче елда Берлинга җиткәндә каты яралана. Сугышта күрсәткән батырлыклары өчен “За отвагу” медале белән бүләкләнә. 1981 елда вафат.