Труженики тыла

Хасанова Саимә Шәһидулла кызы 1927 елның 18 нче июлендә Пәрәү авылында туып үсә. Гаиләдә биш бала, Саимә апа дуртенчесе. Бала чактан урак ура, утын турый. Сугыш елларында окоп казый йөри. Сугыш беткәннән соң, лаеклы ялга чыкканчы сыер сава. “Мактау билгесе” ордены, “Хезмәттәге уңышлары өчен”, “Социалистик ярыш җиңүчесе”, “Ленинның тууына йөз ел тулу уңаеннан”, “Фидакарь хезмәте өчен”, “Хезмәт ветераны”, юбилей медальләре белән бүләкләнә, “Районның иң яхшы сыер савучысы” исеменә лаек була. Бүгенге көндә килене тәрбиясендә кадер-хөрмәттә яши.

Тыл ветераны Хасаншин Габдрахман Хасанша улы, 1931 нче елның 20 нче январендә Татарстан Республикасы Саба районы Татар Икшермәсе авылында туган. “Сугыш башланганын әтидән ишеттем. Безнең гаиләдән әти һәм ике абый сугышка киттеләр. Өчесе дә кире кайтмадылар , сугышта үлеп калдылар.

Хатыйпова Равза Гарифулла кызы 1927 елның 26 ноябрендә Татарстан Республикасы Апас районы Апас авылында туа. Балачагы шунда үтә. Сугыш вакытында төрле эшләрдә эшли. Ул укытучылык һөнәрен үзләштерә. 1945 елдан алып 1984 елга кадәр Равза апа Югары Балтай авылы башлангыч мәктәбендә укытучы булып эшли. 1990 елга кадәр балалар бакчасында музыка җитәкчесе булып намус белән хезмәт итә. Шушы авылда ул үзенең гомерлек яры – Бөек Ватан сугышы ветераны Шәүкәт Хатыйп улы белән таныша һәм 1950 елда гаилә корып җибәрәләр. Бергә тату, матур тормыш итәләр. Ике малай, бер кыз тәрбияләп үстерәләр.

Хафизова Шәмсеҗиһан Мәҗит кызы 1925 елның 2 сентябрендә Сарман районы Иске Имән авылында туган. Яшьли кул арасына керә, йорт эшләрен башкару белән бергә энеләрен дә карау Шәмсеҗиһан апа өстендә була. Бөек Ватан сугышы чорында кайда кушсалар, шунда: Любян урманнарын кисүдә, Чугунскида юл төзелешендә, колхозда хезмәт куя. Гомере буе колхозда эшли, гектарлап чөгендер эшкәртә, сарыклар карый, каравылда да тора. Зарлануны белми Шәмсеҗиһан апа, “эшләдек тә, эшләдек инде”,- дию белән чикләнә.