Труженики тыла

Гарипова Кәримә Гариф кызы 1929 нчы елның 1 январендә Боламык авылында дөньяга килә. 7 класс белем алгач, Алабуга мәдәният-агарту училищесына укырга керә. Укуын тәмамлаган яшь белгечне 1947 елның 1 июлендә үз ишекләрен ачкан балалар китапханәсенә мөдир итеп эшкә алалар. Кәримә Гариф кызы китапханәдә 1953 елга, мөгаллимлек эшенә күчкәнчегә кадәр эшли. Азалак, Иске Минзәләбаш, Сарман авылларында укыта. Тормыш иптәше белән 2 кыз - Илмира белән Фәридәне тәрбияләп үстерәләр. Фәридә әнисе хезмәтен дәвам итеп, Мәскәү шәһәрендәге китапханәдә инглиз бүлегендә китапханәче булып эшли.

Гарипова Рауза Закир кызы 1925 елның 25 нче июлендә Пәрәү авылында Сабир белән Гаишә гаиләсендә туып усә. Гаиләдә җиде бала, Рауза апа беренчесе. Яшүсмер чактан урак ура, утын турый, орлык ташырга йөри. 1941 елда окоп казый бара, Каравай бистәсенә детальләр ясау эшенә җибәрәләр. Шушы авыл егете Миннегалигә кияүгә чыгып, ике ул, ике кыз үстерәләр. Колхозның төрле эшләрендә эшләп, лаеклы ялга чыга. “Фидакарь хезмәте өчен”, “Хезмәт ветераны”, юбилей медальләре белән бүләкләнә. Бүгенге көндә кызы Рузалия, кияве Рифкат тәрбиясендә кадер-хөрмәттә яши.

1928 елның 5 нче июлендә хәзерге Теләче районы Урта Мишә авылында төпчек бала булып дөньяга килә. Яшьтән әтиләре үлеп, авыр тормышта ятим үсә. Баландыш җидееллык мәктәбендә укып белем алгач, 1944 елда 14 яшендә Саба районы Урта-Саба авылында башлангыч сыйныфлар укытучысы итеп билгелиләр. Казанда педучилищеда читтән торып укып, педагогик белем ала. Ләкин 9 ел эшләгәч, кыскартылуга эләгә.

Гарифуллин Гарифулла Сөнгат улы җилкәсендә озын һәм кызыклы тормыш. Ул 1931 елның 7 гыйнварында Татарстан Республикасының Әлмәт районы Сөләй авылында туган. Тыл ветеранына 90 яшь тулган көнне искә алырлык истәлекләре дә бар. "1941 елның 22 июнендә сугыш башланды, миңа 10 яшь иде, әтине сугышка алдылар, гаиләдә алты бала калды. Бөтен эш өлкәнрәкләр җилкәсенә ятты. Колхозда эшли башладык, җәен чәчтек, җыештырдык, урман кистек, барысын да кулдан. Әтисе сугыштан кайтмый, ятим кала. Барлык кыенлыкларга да карамастан, 1947 елда җидееллык мәктәпне тәмамлый.