Хәйдәров Бәкер Мирхәйдәр улы 1908нче елның 6 нчы гыйнварында Татарстан Республикасының Әлмәт районы Урсалабаш авылында туа. Гаиләдә 5 бала була алар: 3 малай һәм ике кыз. Хәйдәров Бәкер 1937-1940 нчы елларда Әлмәт шәһәренеңмай заводында мастер булып эшли. 1941 нче елда Куйбышев шәһәренә производствога эшкә китә. Сугыш башлангач, 1941 нче елның февраль аенда ул да туган җирләрен фашистлардан сакларга дип фронтка юл ала. Бәкер бу вакытта инде тормыш корган була, аны хатыны белән ике баласы озатып кала. Олы кызына нибары 3 яшь, ә малаена 1 яшь була. Хәйдәров Бәкер 11 нче Армиянең 47 нче батальонында хезмәт итә. Мәскәү янындагы Ока елгасын чыгып, Брянск өчен сугыша. 1943 нче елның 15 нче сентябрендә Брянск, Унеча, Красная гора шәһәрләрен азат итүдә катнаша. 4 нче августта Брянск урманында каты яралана. Бу шәһәрне алуда катнашканы өчен “Сугышчан казанышлары өчен” медале белән бүләкләнә. Аннары алар Белорусиягә юнәләләр. Гомель, Карач шәһәрләрен һәм бик күп авылларны азат итәләр.1944 нче елның мартыннан 1 нче Украина фронтына китәләр. Шуннан соң батальон Польшага юнәлә. Висла елгасын чыкканда күрсәткән батырлыклары өчен Хәйдәров БәкерIII дәрәҗә Дан ордены белән бүләкләнә. Польшадан Германиягә керәләр. Дрезден шәһәреннән Чехословакиягә юнәләләр. Бу бәрелешләрдә катнашканы өчен“Праганы азат итүдә катнашканы өчен” медале белән бүләкләнә. Хәйдәров Бәкер сугышта күрсәткән батырлыклары өчен II дәрәҗә Ватан сугышы орденына да лаек була. Ул 1945 нче елның 6 нчы ноябрендә исән-имин туган авылына кайта.
“Безнең батальон – инженерно-саперный батальон.Немец миналарын чүпләп, танкларны чыгардык. Миналар куйдык, энәле чыбыклар суздык һәм алдык, елгалар аркылы войскалар чыгардык”,- дип сөйләп калдырган ул үзенең балаларына һәм оныкларына.
Туган авылына кайткач, Хәйдәров Бәкер загатканторда хисапчы булып эшли. Аннары сельпода, колхозда эшли. Тормыш иптәше Хәмидуллина Фатыйма белән 5 бала үстерәләр. Хәйдәров Бәкер 1985 нче елда туган авылында вафат була.
Гәрәева Гөлмира Абдулла кызы,
Татарстан Республикасы Әлмәт муниципаль районы
муниципаль бюджет гомуми белем учреждениесе “Галеев Р.Г. исемендәге Сөләй урта гомуми белем мәктәбе”нең туган (татар) теле һәм әдәбияты укытучысы
