Тарихын белгән баланың адымнары нык булыр

        “Адымнар-Әлмәт күптелле гимназиясе”ндә укучы һәр бала үзенең туган ягының тарихын, данлыклы якташларын, геройларын белергә тиеш. Гимназия әле быел гына ачылса да, анда инде аерым традицияләр урнашып килә, патриотик юнәлештә системалы эш алып барыла.  Һәр айның бер көне Бөек Ватан сугышына багышлана, бу көнне батырлык дәресләре, сыйныфтан тыш чаралар үткәрелә. Гимназиядә Бөек Ватан сугышына багышланган экспозиция-күргәзмә оештыру өчен мәгълүматлар, экспонатлар  туплау башланды. “Адымнар”ның һәр укучысы үзенең нәсел шәҗәрәсен төзү,  гаиләсенең сугыш белән бәйле булган тарихын өйрәнү эше белән мәшгуль.

      Әлмәт районында төрле сугышларда тиңдәшсез батырлыклар күрсәткән геройлар күп. Шулар арасында Бөек Ватан сугышында Советлар Союзы Герое исеменә лаек булган 2 герой бар – Мотыйк Әхмәдуллин һәм Никита Токарликов. 9 декабрь – Ватан геройлары көне уңаеннан 6 сыйныф укучылары өчен “Герой эзләре буйлап” дигән темага батырлык дәресе оештырылды. Укучылар Советлар Союзы Герое Мотыйк Әхмәдуллинның тормыш юлы, батырлыгы турында укыдылар, өйрәнделәр, фотолар карадылар. Әлмәттә һәм Әлмәт районында Мотыйк Әхмәдуллин исеме белән бәйле урыннарны өйрәнделәр.  Өйрәнгән материалларга таянып, укучылар  “Герой эзләре буйлап“ дип исемләнгән экскурсия маршруты төзеделәр. Әлегә бу сәяхәтнең маршруты виртуаль, ә җәй көне укучылар герой белән бәйле булган истәлекле урыннарга чын сәяхәт оештырырга теләк белдерделәр. Ә аннары үзләре экскурсовод булып, шәһәр кунаклары өчен өч телдә – татарча, русча, инглизчә экскурсияләр оештырырга теләүләрен әйттеләр.   Укучыларның энтузиазмы, кызыксынучанлыклары таң калдырды мине.  Туган якларының тарихын, кешеләрен, аларның  батырлыкларын белсеннәр иде балалар, битараф булмасыннар иде. Тарихын белгән баланың адымнары нык була.

        Гатауллина  Гөлнара Әнвәр кызы

        “Адымнар-Әлмәт күптелле гимназиясе”нең югары категорияле тарих һәм җәмгыять белеме укытучысы.