“Арча нефть продуктлары” җәмгыяте сугыш һәм хезмәт ветераннарына һәрчак зур ихтирам белән карый, аларны хөрмәтли, олылый. “Ветераннарыбызга кагылышлы һәр бәйрәмне билгеләп үтәбез, туган көннәре белән котлыйбыз, бүләген әзерлибез, түгәрәк өстәл артында очрашабыз. Килә алмаганнарның өйләренә барабыз”, – ди оешманың ветераннар советы рәисе 63 еллык хезмәт стажы булган Наил абый Сабиров.
Узган атнада ул профсоюз оешмасы җитәкчесе Мөхәммәт Гыйльметдинов белән берлектә шундыйларның берсе, Яңа Кенәрдә яшәүче Габделмән Абдуллин янында булып, сугыш һәм хезмәт ветеранын туган көне белән котлады, аңа акчалата бүләк тапшырды. “Кәҗәсенә караганда мәзәге кыйммәтрәк”, – дигән халык мәкале бар. Олы тормыш юлы үткән, бүгенге көндә бераз сырхаулап та торган өлкән яшьтәге кеше өчен олылап өенә хәл белергә килү үзе зур шатлык.
Хатыны үзеннән бигрәк ире өчен сөенеп, җитез адымнар белән ни арада чәй өстәлен өлгертте.
– 61 ел бергә гомер итәбез инде. Мине зоотехник буларак, Яңа Кенәргә эшкә җибәрделәр. Төпләнеп тә калырга туры килде. Тату гомер иттек, Аллага шөкер. Кырысрак, таләпчән күренсә дә, йомшак күңелле кеше ул. Яхшылыкны беркайчан да онытмый, – дип Фәүзия апа ирен мактап та алды.
Габделмән абый армиягә 1944 елны китә. 18 яше дә тулмаган була әле. Хәрби хезмәткә өйрәнгәнче сугыш бетеп китә. Егет 7 ел Германиядә була.
– Белемем 7 сыйныф кына. Укырга мөмкинчелек чыкмады. Әмма армия мәктәбе бик әйбәт булды. Рус телен яхшы өйрәндем, – ди Габделмән абый. – Кайткач комбайнчылар курсына укырга киттем. Бераздан үземне райкомга бүлек мөдире итеп билгеләделәр. Аннан язылдым да, Фәүзия белән яшь баланы алып, Алтайга целинага чыгып киттек. Тик туган як сагындырды. Фатир вәгъдә итсәләр дә калмадым, өч елдан кайттым.
Бу еллар Габделмән абыйның үсеш чоры, дисәң дә була. Райпланда хисапчы, аннан, белемне күтәрү курсларын үткәннән соң, шунда ук икътисадчы, яшелчә киптерү, кирпеч заводларында, пекарняда җитәкче, соңыннан сельхозтехникада гараж мөдире була. Шуннан лаеклы ялга да чыга.
– Анда да тик ятарга туры килмәде. Яңа Кенәрдә заправка ачылды һәм мин шунда кердем. Тагын 7 ел эшләдем, – ди Габделмән абый Абдуллин. – Лаеклы ялга чыкканыма да 20 ел инде. Онытмыйлар, килеп хәлемне беләләр, сораган әйберне бирәләр, бәйрәмнәргә чакырып кунак итәләр. “Арча нефть продуктлары” акционерлык җәмгыяте җитәкчеләренә, коллективына, профсоюз һәм ветераннар оешмаларына чиксез зур рәхмәтемне белдерәм.
Гөлсинә Зәкиева
