"Ә безгә җиңү авыр, бик авыр бирелде. Әлеге канкойгыч сугышта җиңү өчен илебез 27 миллионнан артык кешесен югалтты.Ә ятим калган сабыйлар, тол калган хатыннар, ялгыз калган аналар, аларның исәбе бармы? Әлбәттә юк. Инде менә 78 ел буе йомылам - йомылам дигән яралар бу көнне кабат ачыла. Күзләргә яшь тула. Авылыбыздан яу кырына 213 ир-егет чыгып китә. Шуларның 81-е яу кырында ятып калса, 42 - се хәбәрсез югала. 90 кешегә төрле җәрәхәтләр алып булса да исән - имин кайтырга насыйп була. Ләкин, ни кызганыч бүгенгесе көндә аларның берсе дә безнең арабызда калмады. Әлеге, коточкыч сугыш чорының тере шаһитлары булган бердәнбер тыл ветераны һәм 19 сугыш чоры баласы бар. Ходай сезгә сәләмәтлек, бәхетле картлык, җан тынычлыгы бирсен. Әле озак еллар авылыбызның матур ак әбиләре, бабайлары булып яшәсәгез иде. Әмин.", - дип чыгыш ясады Кышлау мәдәният йорты җитәкчесе.
