Корпункт:
Бөек Ватан сугышы ветераны Мөршидә Бәдигова 90 яшьлек юбилеен билгеләп үтте. Мөршидә Гарифҗан кызы Бәдигова (Зарипова) 1925 нче елның 14 ноябрендә Мәскәү өлкәсе Подольск шәһәрендә Хәдичә һәм Гарифҗан Зариповларның беренче балалары булып дөньяга килә. Озак та үтми, сугышка чакыру кәгазе килә. 50-ләп кызны баржага төяп, Горький шәһәренә җибәрәләр. Монда 4 ай чамасы радиотелефонисткага укыталар аларны. Аннан, II Белоруссия фронты составында, Рокоссовский җитәкчелегендә Белоруссия, Польша җирләрен, Кенингсбергны азат итүдә катнаша ул. Берлинга якынлашып килгәндә, рациядән “Германия башкаласында көчле сугышлар бара”, дип хәбәр итәләр. 4нче май көнне алар да шәһәргә керәләр. Шпрее елгасы буйлап, катерларга утырып качарга җыенган фашистларны тоткарлыйлар.Шәһәрдә сугыш дәвам итә. Мөршидә апа 4 кыз белән бер йортта торалар. Шунда, 8 май көнне сугыш бетү хәбәрен ишетә ул. Әле һәр почмактан диярлек атсалар да, рейхстагка баралар, Мөршидә апа стенага үз имзасын сала. Данлыклы Бранденбург капкасына киләләр – монда да татар кызы имзасын эзләп табарга була. Биредә АКШ солдатлары белән фотога төшәләр. 5 ай дәвамында Кольсдорф шәһәрендә хезмәт итә һәм 1945 елның ноябрендә, яңа 20 яшен тутырып, авылына кайта. Хәзерге вакытта Мөршидә Бәдигова Казан шәһәре Осиново бистәсендә, сугыш ветераны буларак, хөкүмәт тарафыннан бирелгән фатирда көн күрә. Бөтен уңайлыклары булган фатиры өчен куанып туймый ветеран. Балалары, оныкларының ярдәмен тоеп яши ул.
