1941 елның 22 июнендә немец-фашист илбасарлары безнең илебезгә басып керделәр, шәһәрләрне, авылларны талый, яндыра башладылар. Халкыбыз, бердәм булып, дошманга каршы көрәшкә күтәрелде.
Илебезнең барлык халыклары белән бергә авыр көрәштә татар язучылары да катнаштылар; язучы, шагыйрь, журналист буларак фронт газеталарында хезмәт иттеләр; кулларына корал алып, алгы сызыкларда сугыштылар; ялкынлы сүз белән җиңүгә ярдәм иттеләр. Әдәбият Җиңүгә ышанычны ныгытуга зур иҗат ялкыны белән хезмәт итте.
21 нче март көннеӘлмәт районы Сөләй урта мәктәбенең 8 нче сыйныф укучылары татар әдәбияты дәресен мәктәпнең Туган якны өйрәнү музеенда уздырдылар. Алар дәрестә сугыш темасына язылган әсәрләрне искә төшерделәр. Миргазыян Юнысның “Шәмдәлләрдә генә утлар яна” әсәренә анализ ясадылар. Укучылар Муса Җәлилнең, Абдулла Алишның, Фатих Кәримнең сугыш темасына иҗат ителгән шигырьләрен яттан сөйләделәр. Мәктәп музееның бер бүлеге авылдашыбыз Советлар Союзы герое Мотыйк Әхмәтҗан улы Әхмадуллинга багышланган.Укытучы Гәрәева Г.А. укучыларны шул бүлектәге мәгълүматлар белән таныштырды, тормыш юлы, сугыштагы батырлыгы турында сөйләде. Укучылар дәресне бик кызыксынып тыңладылар, үзләре өчен күп белем тупладылар.
Гәрәева Гөлмира Абдулла кызы, туган (татар) теле һәм әдәбияты укытучысы,
Татарстан Республикасы Әлмәт муниципаль районы муниципаль бюджет гомуми белем учреждениесе “Галеев Р.Г. исемендәге Сөләй урта гомуми белем мәктәбе”
