Батыр аналарга Дан!

Тиздән халкыбыз Бөек Җиңүнең 80 еллыгын билгеләп үтәчәк.80 ел - ул бик күп кебек, әмма шул дәһшәтле еллар калдырган авыр , ямьсез кара буразналар әле бүген дә халык күңелендә төзәлеп бетмәгән тирән яра булып тора.Бүген Елховой һәм Түбән Абдул авылларыда шул чорларда яшәгән авылдашларыбызны бармак белән генә санап чыгарлык.. Халиулла Әхмәтшин исемендәге Елховой авыл тарихы музеенда тыл хезмәтчәннәренең, сугыш чоры балаларының һәм илебез өчен көрәштә катнашкан авылдашларыбызның олы истәлеге саклана.Музеебыз фондларында тарихи мәгълүматләр дә, истәлекле фотосүрәтләр дә бик күп. Бөек Җиңүнең 80 еллык юбилее уңаеннан музейда гыйнвар аеннан март аена хәтле “ Аларның кулларында эш, ә күңелләрендә җиңү дәрте” исеме астында Бөек Ватан сугышы вакытында ирләрен , балаларын сугышка озаткан, дүртәр – бишәр аннан да күбрәк берсеннән берсе кечкенә балалар белән ялгыз калган аналарның якты истәлегенә багышлап ясалган күргәзмә эшләп килде. Күргәзмәдә Елховой авылы урта мәктәбеннән , тирә – як авыл мәктәпләреннән укучы балалар да, олылар да булды. Бөек Ватан сугыш чорларында “ Барысы да фронт өчен, барысы да җиңү өчен” дигән девиз астында яшәгән , шул чорларлардагы барлык авырлыкларны үз җилкәләрендә күтәргән авылдашларыбызның олы батырлыгы искә алынды.
Аналар... Күпме хәсрәт кичергәннәр алар. Бер гаиләдән генә дә дүрт бертуган сугышка чыгып киткән егетләрнең берсе дә кайтмый калганнары бар. Ул вакытларда көн дә диярлек кара пичәтле хат килеп торган. Әмма халык бердәм булган,дошманга булган көчле нәфрәт,җиңүгә булган олы ышаныч аларны кайгылар алдында сынмаслык иткән.Язгы ташулар вакытында 35 әр километр ераклыктан җәяүләп колхозга орлык ташыганнар,7 -әр гектар урак урганнар,урман кисәргә, окоп казырга, сугыш үткән җирләрне җимерекләрдән арындырырга да йөргәннәр. Кыскасы ирләр дә күтәрә алмаслык бөтен авырлыкны хатын кыз җилкәсе күтәргән.Фронттагы ирләре, уллары, туганнары,
авылдашлары туңмасын дип җылы бияләй,йон оекбашлар, шарфлар бәйләп җибәргәннәр. Аларның тамаклары тук булсын диеп булдыра алганны да алмаганны да эшләп, фронтка җибәрер өчен ат олауларына төяп, Шынтала станциясенә кадәр икмәк ташыганнар. Атлар арый торган булган, аларны алыштырганнар, ә кешеләр алышынмый эшләгәннәр. Менә шушы бердәмлек һәм тырышлык фронттагы сугышчыларга да көч биреп торган, дошманны тар- мар итеп Бөек Җиңүгә ирешергә зур этәргеч булган.
Безгә шундый матур тормыш бүләк итеп калдырган батыр аналарга да , егет – кызларга да, батыр сугышчыларыбызга да тирән рәхмәтебезне белдереп, алар алдында башларыбызны иябез!