Банкта өч буын очрашуы булды

Россия саклык банкының Арча филиалында үзенчәлекле һәм кызыклы очрашу үткәрелде. Филиал коллективы кунакка озак еллардан бирле үзләренең клиентлары буларак, акчасын салган һәм пенсиясен алган сугыш, тыл һәм хезмәт ветераннарын чакырды. Алар арасында заманында төрле өлкәләрдә эшләгән апалар һәм абыйлар бар иде. Өлкәннәрне бәйрәм белән тәбрикләү өчен хезмәткәрләр балаларын да чакырган. Шулай бу чара өч буын очрашуына әверелде.

Кунакчыл банк хезмәткәрләре өлкәннәрне ишек төбендә үк каршы алды, бәйрәм белән тәбрикләде, һәрберсенә чәчәкләр бүләк итте. Балалар сугыш һәм тыл ветераннары өчен шигырьләр сөйләде.

Аннан очрашу чәй өстәле артында дәвам итте. Ветераннарның сөйләшер сүзләре күп җыелган иде. Алар бик теләп үзләре белән таныштырдылар, сугыш чорында тормышлары турында сөйләштеләр, хәзерге матур, рәхәт, тыныч тормышның кадерен белеп яшәүләре турында да әйтергә онытмадылар, балаларга һәм яшьләргә теләкләрен җиткерделәр.

• Мин тракторчылар курсын тәмамлап, бронь белән кала ала идем. Үз теләгем белән фронтка киттем. 1944 елда армиягә алындым һәм 1951 елга кадәр хезмәт иттем. Башта Иркутскида, аннан Ерак Көнчыгышка җибәрделәр. Бик авыр вакытлар булды, ачлыгын да кичердек, юньле кием дә кимәдек. Без, 17 яшьлек егетләр, шунысына сөендек, Ерак Көнчыгышка барып җиткәндә японнарга каршы сугыш тәмамланган иде инде, — ди озак еллар сәүдә өлкәсендә җитәкче урыннарда эшләгән Үзбәк Сабиров. — 1947 елда Одессага җибәрделәр. “Черная кошка” бандасы белән очрашырга, бандерачыларга каршы көрәшергә туры килде. Ул үзе икенче фронт иде.

Гадения Гәрәева белән Саймә Гыйлемханованың да әйтер сүзләре бар иде. Алар да сугыш елларының бөтен авырлыкларын башларыннан кичергәннәр, тик сынмаганнар, сыгылмаганнар.

• Чәчәк кебек вакытка туры килде ул сугыш, -дип башлады сүзен Гадения апа. — Фашистлар илебезгә бәреп кергәндә миңа бары 16 яшь иде. Бригадир да булдым, учетчик та, хәтта колхоз рәисе дә. Арчадан (мин үзем Балтач районының Куныр авылыннан) чана белән орлык ташыдык, ат җиктек. Ул мескен атларга кадәр ачлыктан алҗыдылар, хәлсезләнделәр. Күтәреп торгызабыз. Үзебезнең дә ашарга юк. Аллага шөкер, бүгенге тормышыбыз бик рәхәт. Шуның кадерен белергә кирәк.
• Хезмәтенә генә түзәсең, күпме салым түлисе бар бит. Бәрәңгең, тавыгың, сыерың булмаса да, итен, йомыркасын, бәрәңгесен сорыйлар, — дип сүзгә кушылды Саймә апа. – Әти сугышка киткәндә без 6 бала калдык. Гаиләне туендырыргамы, салым түләргәме?
• Минем 10 яшьлек кызым бар. Үзем сезне тыңлыйм, үзем аның турында уйлыйм, сезнең белән чагыштырам. Сез аның яшендә урак урган, көлтә бәйләгән. Ә безнең балалар рәхәт тормышта яши. Шуңа сөенәбез. Бәхеткә, ул заман турында балаларыбыз, хәтта без дә ишетеп кенә беләбез. Киләчәктә дә көннәребез аяз булсын, сугыш афәтләре килмәсен иде.- диде филиал мөдире Клара Заһидуллина ветераннарны бәйрәм белән котлап, аларга сәламәтлек, озын гомер, тыныч томыш теләп.

Район башкарма комитетында эшләгән Шәүкәт  Зәйнуллин да, район эчке эшләр бүлегендә хезмәт иткән Равил Галимов та, сугыш һәм хезмәт ветераны Госман Габдрахимов та,  лаеклы ялдагы саклык банкы хезмәткәрләре Диләрә Шәрәфиева, Эльмира Камалиева да аның бу сүзләре белән килештеләр.

• Сугыш чоры узды. Авырлыклар артта калды. Хәзер бүгенге матур тормышның кадерен белеп яшәргә кирәк, — диде Шамил Хуҗин.- Менә мин озак еллардан бирле безгә хезмәт күрсәткән Россия саклык банкының Арча филиалы хезмәткәрләренә рәхмәт сүзләре җиткерәсем килә. Һәрберсенең үз тормышы, төрле чаклары буладыр. Әмма алар тупаслык күрсәтмиләр, авыр сүз әйтмиләр, һәрвакыт елмаеп, якты чырай белән каршы алалар, тиешенчә хезмәт күрсәтәләр. Аларны күпләргә үрнәк итеп куярлык. Киләчәктә дә шушы рух белән эшләгез. Безне хөрмәт итүегез өчен зур рәхмәт.

Госман ага да аның сүзләре белән килеште, 27 ел эшләүче Сания Салихова, 31 ел хезмәт стажы булган Лилия Зарипованы аерым телгә алып китте, аларга рәхмәтен җиткерде.

Соңыннан банк хезмәткәрләре кунакларга  бүләкләр дә тапшырдылар. Әнә шундый җылы, матур чара булды ул.

Гөлсинә Зәкиева