Түбән Бәрәскә авылында гомер итүче Әминә Хөснетдинова олуг юбилеен билгеләп үтте.
Бүгенге көндә үзен бәхетле хис итә ул. Улы, килене тәрбиясендә гомер итә. Аларга хәрвакыт ярдәм итәргә тырыша. Кызы да бу хакта: “Киленебез белән энебезгә рәхмәт. Нинди генә эш башкарсалар да бергәләп башкаралар. Хатын-кыз, ир кеше эше дип бүлеп эшләү юк бу йортта. Камыр ризыгы пешерә башласалар да өчесе бергә эшлиләр,” дип елмая.
Ә Әминә әбидән озын гомер яшәүнең сере турында сорашкач: “Биш бала үстердем. Аллага шөкер балаларым кайгы-хәсрәт китермәделәр. Бүгенге көндә дә үз тормышлары, мине сөендереп яшиләр”, диде ул.
Әминә әбинең 12 оныгы һәм 9 оныкчыгы бар. 10 нчы оныкчык туарга тора икән. Барлык үз яшьтәшләре кебек тормыш авырлыгын үз җилкәсендә татый ул. Колхоздагы барлык төр хезмәтне дә башкара. “Кыркачыктан капчыкны иң өстенә салып, 20шәр кило ашлык алып кайтабыз. Чабатам тузды. Яланаяк кайттым. Ничек кайтып җиткәнемне хәтерләмим”, дип искә алды ул елларны Әминә әби. Ә бүгенге тормышына шөкер ана кылып яши.
