Корпункт:
25 апрель көнне ел саен үткәрелә торган татар халкының бөек шагыйре Габдулла Тукайның туган көненә багышланган “Тукай бәйрәме” быел да Әтнә дәүләт драма театры бинасында зур чара булып узды. Монда шагыйрьнең иҗатын хөрмәт итүчеләр, Тукай үрнәгендә һәваскәр язучылар үзләренең шигьри юлларына салынган саллы фикерләре белән уртаклаштылар. Биредә якташыбыз Илгиз ага Кадыйров (“Тукайлы Әтнә”, “Бәхет телим” һ.б.) Габдулла Тукайга багышлап язган шигырьләрен тәкъдим итте , китаплар авторы шагыйребез Җәүдәт Файзрахманов чыгыш ясады (“Моңлы бала”, “Тынгысыз җан бит син Тукай”); һәваскәр шагыйрьләребез Венера Зиганшина (“Чишмә буе”), Гөлназ Хөснетдинова (“Ятим бала”), Гөлсинә Әхмадуллина( “Тукайга”), Миләүшә Валиева, Сылу Зарипова (“Төштә күрдем мин Тукайны”) Тукайга багышлап үзләре иҗат иткән шигырьләре белән чыгыш ясадылар. Шулай ук районыбызның мәктәпләреннән килгән укучылар Тукай әсәрләрен сәнгатьле итеп укыдылар. Тукай әсәрләренә иҗат ителгән җырларны Риваль Хисматуллин (“Тәфтилләү”) һәм Гөлүзә Сираҗиева (“Әллүки”) башкардылар. Ахырдан Тукайның “ Туган тел” җыры тамашачылар белән бергә башкарылды.
