Бөтенроссия “Җиңү тәрәзәләре акциясе кысаларында Югары Балтай авылында яшәүче Бөек Ватан сугышы ветераннары Шәүкәт абый Хатыйповка һәм Хәлилрахман абый Фәйзрахмановка җырлы бәйрәм котлаулары ирештерелде. “Бөек Җиңү бәйрәмен каршыларга санаулы гына көннәр калды. Үзизоляция режимы кертелү сәбәпле, ветераннарыбыз белән якыннан очрашып булмый. Тик шулай да зур бәйрәм көнендә без аларның батырлыгын билгеләп үтмичә, аларга булган олы ихтирамыбызны белдермичә кала алмыйбыз. Быел исә аларга булган хөрмәтебезне, олы рәхмәтебезне тагын да үзенчәлеклерәк итеп ирештерәбез”, - дип белдерде район башкарма комитеты җитәкчесе урынбасары Луиза Сафина.
Тәбрикләүләргә район мәдәният бүлеге җитәкчесе Рөстәм Мингазиев, Урта Балтай авыл җирлеге башлыгы Илфир Гәрәев район мәдәният йорты, медицина хезмәткәрләре кушылды. Районыбызның җырчы егете Айрат Айтуганов бар җиһанга Җиңү җырын яңгыратты.
Бу чараны тәрәзә аша гына күзәткән ветераннар күз яшьләре аша олы рәхмәтләрен ирештерделәр.
