25 гыйнварда Зәй “Радость” халыкка социаль хезмәтләр күрсәтү учреждениесендә Ленинградны дошман камалышыннан азат итүгә 75 ел тулу уңаеннан чара узды.
Бөек Ватан сугышы башлангач та фашистлар Ленинградны яулап алуны иң зур максат итеп куя. 1941 елның көзендә шәһәрне тулысынча чолгап алып, бертуктаусыз утка, бомбага тоталар. Әмма дошман боҗрасында калган шәһәрдәге коточкыч шартлар ленинградлыларның һәм аны саклаучыларның рухын сындыра алмый, фашистларның төньяк башкаланы басып алу планнары барып чыкмый. Совет солдатларының тиңдәшсез батырлыгы, Ленинград халкының фидакарь хезмәте һәм ныклыгы 1943 елда дошман боҗрасын өзәргә, ә бер елдан шәһәрне камалыштан тулысынча азат итәргә мөмкинлек бирә. Бу җиңү бик кыйммәткә төшә. 900 көнгә якын сузылган Ленинград камалышында ачлыктан һәм салкыннан миллионнан артык кешенең гомере өзелә.
Ленинград янында гитлерчыларны тар-мар итүгә республикабыз да өлеш кертә. Шәһәрне саклауда һәм чолганыштан коткаруда йөз меңләгән якташыбыз, шул исәптән әлкилеләр дә катнаша. 45 меңнән артык татарстанлы Нева ярындагы шәһәр өчен сугышларда һәлак була.
Патриотик рух тәрбияләү, Ватанга тугрылык, толерантлык, этникара һәм конфессияара мөнәсәбәтләр культурасын формалаштыру максатыннан, социаль хезмәт алучыларның гаилә һәм балаларга социаль ярдәм күрсәтү бүлеге белгечләре кызыклы формада заманча яшьләргә Бөек Ватан сугышының төп вакыйгалары һәм геройлары турында искә төшерделәр, “Ленинград шәһәрен саклап калу” дигән квест-уен үткәрделәр.
Алдан әзерләнгән маршрут буенча 5-10 кешедән торган команда биремнәрне үтәп, этапларны уздылар. Әгәр бирем дөрес үтәлсә, команда баллар алды. Биремнәр “Ленинград блокадасы” темасы белән бәйле иде. Балларны да күбрәк җыйган команда җиңүче дип танылды. Җиңүчеләр командасы истәлекле бүләкләр белән бүләкләнде.
Чарада “Застава” хәрби-патриотик клубы вәкилләре дә катнашты, алар очрашуда катнашучылар өчен күрсәтмә чыгышлар оештырдылар, мастер-класс үткәрделәр.
И. Сафиуллина, социаль педагог.
