Югары Балтай авылында гомер кичерүче Мансур бабай Кәлимуллин Ил Башлыгы котлавын алды

Югары Балтай авылында гомер кичерүче Мансур бабай Кәлимуллин 90 яшьлек олы гомер бәйрәмен билгеләп үтте.

Үзен котларга килгән балаларын, оныкларын, туганнарын һәм район җитәкчелеген дә капка төбеннән үк елмаеп каршы алды ул. Тормыштагы авырлыкларны да нәкъ шулай якты йөз, күтәренке рух белән үткәрә белгән Мансур абый. Бүгенге көндә дә кулыннан балтай, чүкеч төшми аның. Көннәрен дә станок артында үткәрә. Тирә-күршеләренең, авылдашларының йомышларын үтәп, ярдәм итеп тора. Гомере буе туганнарын, балаларын җылы кочагына сыендырып, җан җылсын өләшеп яши ул. 45 ел буе авыл хуҗалыгында хезмәт итә. Озак еллар комбайнда туган як кырларын иңли. Тырышлыгы, фидакарь хезмәте күпләгән Мактау Грамоталары, медальләр белән бәяләнә. Тормыш иптәше Мөнирә апа белән берсеннән-берсе уңган, тырыш 5 бала тәрбияләп үстерә алар. Балалары да хезмәтне сөеп, үрнәк күрсәтеп, әтиләрен сөендереп яши.
Мансур абыйга юбилее уңаеннан Ил башлыгының Котлау хаты, район башлыгының Котлау открыткасы, бүләге һәм чәчәк бәйләме тапшырылды. Район башкарма комитеты җитәкчесе урынбасары Луиза Сафина, Балтай авыл җирлеге башлыгы Рифкать Хәбибуллин, “Свияга” агрофирмасының Балтай бүлекчәсе җитәкчесе Рамил Шәрәфуллин изге теләкләрен җиткерде.