«Ничә генә яшьтә булсаң да яшәүдән туеп булмыйдыр ул. Күз күргәндә, колак ишеткәндә, аяк йөргәндә картлык та бик сиздерми. Олыгаерга балалар, онык-оныкчыклар да ирек бирми. Алар белән чөкердәшеп яшәве бик рәхәт», – ди Красный борда гомер кичерүче Зәкия апа Ибәтуллина.
Гомер китабының битләрен ачып карасаң, анда бормалы юллар да, хәсрәтле көннәр дә, шатлыклы мизгелләр дә күп булган. Китап Салагышта узган балачактан башлана.
– Миңа 11 яшь чагында – әти, бер елдан әни авырып вафат булдылар. Мин, әнә шулай, апа белән җизни тәрбиясенә калдым. Ятим дип кыерсытмадылар, шөкер, – ди Зәкия апа.
Үсмер елларны тасвирлаган бит аеруча күңелгә тия торган. Сугыш башланганда 14 кенә яшьлек булган Зәкиягә дә көнне-төнгә ялгап колхозда эшләргә туры килә.
– Сугыш беткән дигән хәбәрне басуда колхозчыларга аш пешергәндә ишеттем. Кемдер сөенеп «ура» кычкырды, якыннары һәлак булганнар үксеп елады шул чакта, – дип искә ала бу көнне Зәкия апа.
9 Майда колхоз рәисе авыл халкы өчен бәйрәм ясый. Үгез суеп ит өләшәләр, дүртәр кило он бирәләр. «Илгә тынычлык килгән көн иң бәхетле мизгелләр бүләк итте безгә», ди Зәкия апа.
Гомер китабының өченче бите Зәкиянең Красный борга ашлык кабул итү пунктына килүеннән башлана. 1948 елда бирегә эшкә билгеләнгән кыз Әгерҗедән кунакка килгән Мулламөхәммәт белән таныша һәм яшьләр Красный борда төпләнеп тә калалар. Икесе дә ашлык кабул итү пункты ябылганчы шунда эшлиләр. Аннан соң Зәкия апа ун ел кибеттә авыл халкына хезмәт күрсәтә. Мулламөхәммәт абый белән 58 ел бергә яшиләр, ике балага гомер бүләк итәләр.
– Әтиебез сугыш инвалиды иде. Әнкәй тәрбияләп яшәгәнгәдер, әткәй дә озын гомерле булды, – ди Наилә ханым.
Хәзер балалар әниләрен кадер-хөрмәттә яшәтәләр. Красный борда яшәүче улы Равил һәм аның гаиләсе көн саен әниләре янына киләләр. Оныклар да – биредә еш кунак. Зәкия әбинең ун оныкчыгы да бар инде.
Китапның гомер көзен тасвирлаган соңгы битләренең дә, әнә шулай, сөенечле мизгелләргә бай булуын телибез. Зәкия апаның нурлы өеннән беркайчан да кеше өзелмәсен, үзенә бәхетле картлык кичерергә язсын.
Миләүшә Ягъфәрова
