Тукай районы Яңа Сарайлы авылында тыйнак кына бер бабай –Бөек Ватан сугышы фронтларында зур батырлыклар күрсәткән Хисаметдин Кыям улы Садриев яши. Сугышта батыр йөрәкле, ә тыныч тормышта җиңнәре сызганулы тырыш хезмәт кешесе булган ул.
Сугыш башланганда уналты яшен тутырмаган егет авылда, өлкәннәр белән бергә көнне-төнгә ялгап, ат урынына эшләгән. Фронтка бик китәсе килсә дә, яшең җитмәгән, диләр. 1944 елның декабрендә 19 яшьлек Хисаметдинне солдатка алалар. Ижау, Дзержинский һәм Мәскәүдәге запас полкта күнегүләр үтә. Аннары ететне маршал Рокосовский җитәкчелегендәге дүртенче Украина фронтына җибәрәләр. Аларның данлыклы отряды Кенигсберг, Польшаның Донца плацдармын, Одер елгасын һәм Германия шәһәрләрен алуда катнаша. Хисаметдин солдат 1948 елда гына туган авылына кайта.
Фәрхенур апа белән гаилә корып, дүрт бала үстергәннәр. Эшкә батыр Хисаметдин абый ул чагындагы иң авыр һәм абруйлы шахтер һөнәрен үзләштерү нияте белән Пермь якларына барып чыга. Шахталарда эшли, Фрунзе шәһәрендә ТЭС төзелешендә катнаша. Олыгая барган саен күңеле туган якларына тартыла. Һәм ул гаиләсе белән бөек төзелешләр барган Чаллы каласына кайта. Лаеклы ялга чыкканчы силикат кирпеч заводында эшли. Күптәнге хыялын тормышка ашыра – туган авылы Яңа Сарайлыга кайтып төпләнә. Тормыш иптәше белән икесенә дә 90 яшь хәзер, матур яшиләр, тормышлары мул. Башларына авыр кайгы да килде – олы уллары Хәлил абый 52 яшендә үлеп китте. Аның рухына догалар багышлап юаналар.
Күкрәге тулы орден-медальләре чыңлап торган хисаметдин бабай – безнең горурлыгыбыз, чөнки ул безгә тыныч тормыш бүләк итүчеләрнең берсе.
