Район башкарма комитеты җитәкчесе урынбасары Луиза Сафина юбилярны кайнар котлап Ил башлыгының Котлау хатын, район башлыгы исеменнән Котлау открыткасы һәм бүләген тапшырды. Авыл җирлеге башлыгы Фәрит Вәлиев шулай ук изге теләкләрен җиткерде.
Вәгыйзь бабай Олы Бакырчы авылында туып үскән. Сугыш башлангач мәктәптә белем аласы урынга, өлкәннәргә булышырга, колхоз эшенә чыгарга туры килә аңа. – 1941 елны бишенче классны бетергәч үк бригадир Хәсән абый эшкә чакыра башлады инде. Ындырда арыш суктыруда катнаштык. Октябрьдә хәрбиләр килде. Мәктәптә укулар тәмамланды. Шуннан бирле гел хезмәттә булдык, - дип сөйли ул. Шулай ук тимер юлда, СМУда крановщик булып эшләүләрен бәйнә-бәйнә сөйләргә ярата ул.
Бүгенге көндә Вәгыйз бабай тормыш иптәше Тәгъзимә апа белән парлы гомер кичерәләр. – Бабаем бик әйбәт минем, 51 ел иңне-иңгә куеп яшибез. Ике ул тәрбияләп үстереп, тормышларын булдырдык. Инде менә Ходайга шөкер итеп рәхәт тормышта, оныклар сөеп, аларның шатлыкларын уртаклашып яшибез, - ди Тәнзилә әби. Ике уллары Ленар белән Рөстәм әти-әниләренә рәхмәтле, аларның күзләренә генә карап торалар. Киленнәре Рузалия апа җылы сүзләрен кызганмый. – Бу йортка килен булып төшкәнгә 24 ел. Алар мине бик җылы итеп каршы алдылар. Әти-әни белән дус-тату яшибез, беркайчан да авыр сүз әйтешкәнебез юк. Киләчәктә дә тигезлектә, сәламәтлектә, муллыкта, балалар, оныклар игелегендә яшәргә язсын, - ди ул.
