Морзаларда яшәүче Саимә әби Сираҗиева Ил башлыгы котлавын алды

Морзаларда яшәүче Саимә әби Сираҗиева 90 яшьлек гомер бәйрәмен билгеләп узды.

Әлеге уңайдан аңа Ил башлыгының котлау хаты, район башлыгының котлау открыткасы һәм бүләкләре тапшырылды. Район башкарма комитеты җитәкчесе урынбасары Луиза Сафина, Каратун авыл җирлеге башлыгы Рамилә Сабирҗанова иң изге теләкләрен җиткерде. 
Саимә апа озак еллар колхозда хисапчы булып эшләгән. Яшьли тол калып 2 бала үстергән. Кызганычка каршы, балаларын бик иртә югалткан ул. Бүген оныклары хөрмәтен, күршеләре кайгыртуын, социаль хезмәткәрнең тәрбиясен тоеп яши. Йорт эшләрен үзе башкарырга тырыша. 
Оныклары бик ярата үзен. Туган көненә дә Мәскәүдән кайтканнар һәм бер кочак роза чәчкәләре бүләк иткәннәр.