Кодашта Җиңү бәйрәме уңаеннан тантаналы чара узды

            Җиңү бәйрәме көннәрендә авылларда сугыш һәм тыл ветераннарын, сугыш чоры балаларын зурлау чаралары уза. Сугыш һәм тыл ветераннарына ТР Президенты Рөстәм Миңнеханов, район башлыгы Валерий Макаров, авыл җирлекләре исеменнән котлау открыткалары, күчтәнәчләр тапшырыла.

            Кодашта бәйрәм чарасы башлангыч мәктәп-бакча бинасында үтте.

            Мәктәп укучыларының, мөгаллимнәрнең  сугыш китергән афәтләр, тылдагы фидакарь хезмәт турындагы чыгышлары күңел кылларын тибрәтте. Кодаштан яу кырына 176 кеше китә, шуларның нибары 48енә генә исән-имин кайту насыйп була. 89 тыл ветеранының да нибары 5се генә исән бүген. Шулардан чарада катнашкан Зөлфия Шагиевага авыл җирлеге башлыгы Фәнис Шакиров бәйрәм күчтәнәче тапшырды. Сугыш чоры балаларының да 13е генә арабызда яши. Алар да олыгаеп баралар инде. Бәйрәмгә дә барысы килә алмаганнар.

            Сезнең яу кырыннан кайта алмаган әти-бабаларыгыз, якыннарыгыз өчен яшисегез бар әле. Шуңа Ходай озын гомер, сәламәтлек насыйп итсен, – дип теләде Фәнис Миңнефлүр улы.

            Ә  сугыш кырында ятып калган, аннан кайтып тыныч тормышта вафат булган солдат якыннарын онытмыйлар кодашлылар. Әнә, «Үлемсез полк» акцисендә катнашу өчен күпме фотоларны яңартканнар. Чара көнне аларны күтәреп авыл уртасына сугыш каһарманнары хөрмәтенә куелган һәйкәл янына да чыктылар алар. Ә мәктәп укучылары һәйкәлгә чәчәкләр салдылар.

            Бәйрәм чәй табыны артында дәвам итте. Авыл үзешчәннәре өлкәннәргә моңлы җырларын бүләк иттеләр, сугыш турында шигырьләр сөйләделәр. Аларның күбесенең йөзендә моңсулык чагыла иде.  «Җиңү көне – авыр бәйрәм: куаныч та, сагыш та ул» дип юкка гына әйтмиләр шул.