- ВКонтакте
- РћРТвЂВВВВВВВВнокласснРСвЂВВВВВВВВРєРСвЂВВВВВВВВ
- РњРѕР№ Р В Р’В Р РЋРЎв„ўР В Р’В Р РЋРІР‚ВВВВВВВВРЎР‚
- РЎРєРѕРїРСвЂВВВВВВВВровать ссылку
Районыбызның тагын бер өлкән кешесе үзенең күркәм юбилеен билгеләп үтте. Кече Кайбыч авылында яшәүче Закирә Гарәфетдиновага 90 яшь тулды.
Шул уңайдан башкарма комитетның эшләр белән идарә итүчесе Дания Бәдретдинова юбилярга Рәсәй Президенты Владимир Путиннан котлау хаты, район башлыгы Альберт Рәхмәтуллиннан открытка һәм истәлекле бүләк тапшырып, шәхсән үз исеменнән дә изге теләкләрен ирештерде. Ябалак авыл җирлеге башлыгы Мөслимә Гыйззәтуллина шулай ук Закирә әбине бәйрәме белән котлады:
– Бүгенге матур, якты көннәр өчен без сезнең алда баш иябез. Бәхетле, тыныч картлык, сәламәтлек телибез, – диде ул һәм бүләк тапшырды.
Закирә Гарәфетдинованың яшьлек еллары сугыш чорына туры килеп, аңа ачысын да, төчесен дә татырга туры килә.
– Күрше хатыны белән урман кисеп, тайга урманнарына кадәр бардык. Барыбыз да хатын-кызлар, зур-зур агачларны егып турый идек, анда эшләгәндә баракта яшәдек, – ди ул. – Галиулла исемле кеше кызын алырга килмәсә, Себердән кайта да алмас идем, барыбыз бергә җыелышып, поездга утырып кайттык без аннан.
Алга таба үзенең туган авылы Кече Кайбычта гомер итүче Камалетдингә тормышка чыга, өч бала тәрбияләп үстерәләр, күпләрне көнләштерерлек итеп бергә 51 ел яшиләр.
– Камалетдинем әйтеп бетергесез әйбәт кеше иде, тырыш булды, фермада эшләде, гомере буе мине кадерләп яшәде, бик сагынам үзен, ялгызлык кыен икән, – дип хөрмәт белән искә ала әби тормыш иптәшен.
Юк, Закирә әби ялгыз түгел, бүген ул улы Габбас белән гомер кичерә, күршедә генә гаиләсе белән кызы Миләүшә яши, Ралия исемле кече кызы Казан шәһәрендә, дүрт оныгы, бер оныкчыгы бар. Закирә әби бик рәхмәтле аларга.
– Хәзер барысы да әйбәт, йорт-җирләр матур, урамнар чиста, бөтен әйбер бар, Аллага шөкер, шифалы яңгырлар да явып үтте, сөенечемнән хәтта елап та җибәрдем, – дип шөкер итә 90 яшьлек әби. – Тормышыбыз матур, ашарга җитәрлек, яшибез икән, Ходай тынычлыктан һәм саулыктан аермасын. Барлык кешеләргә дә шуны телим, теләкне үзеңә генә теләсәң, ул кабул булмый. Яшьләр бүгенге тормышның кадерен белсен иде! Туган көнемдә хөкүмәттән мондый игътибар һәм хөрмәт күрүемә дә бик шатмын, рәхмәт җитәкчеләргә.
Закирә Гарәфетдинованың теләкләре кабул булып, исәнлектә һәм саулыкта тагын бик күп туган көннәрне каршыларга язсын иде!
Лейсан САТТАРОВА