Җиңү бәйрәме Шәмәк авылы халкы өчен истәлекле булды. Шушы көннәрдә генә районга билгесез солдат җәсәде табылуы һәм аның Апас районыннан булуы турында хәбәр килде
Түбән Кама шәһәренең “Нефтехимик” эзләнү отряды Смоленский өлкәсенең Ярцев районында билгесез югалган солдат җәсәде табалар. Медальонында “Валиев Фатих, 1911г.р, уроженец ТАССР, Казанская область, Апастовский район, с/с Шемяк, дер. Шемяк. Семья Валиева Шамсенур” дигән язулар була. Ул хәбәрсез югалганнар исемлегенә кертелгән була. Район башлыгы Рәшид Заһидуллин, район хәрби комиисариаты ярдәме белән туган авылы Шәмәккә кайтарылды. 9 май Җиңү көнендә район башлыгы Рәшид Заһидуллин, хәрби комиссар Илшат Паймурзин, авыл җирлеге башлыгы Рифкат Хәбибуллин һәм барлык авылдашлары катнашында туган авылы зиратына барлык йолаларга туры китереп җирләнде. Бердәнбер улы Мансур абый Вәлиев әтисен эзләп табучыларга, кайтаруда, җирләүдә ярдәм итүчеләгә олы рәхмәтен җиткерде. - Әти киткәндә мин өч яшендә булганмын. Гомер буе әтисез үссәм дә, 77 елдан соң туган авылга барлык йолаларга туры китереп җирләү бәхетенә ирештем. Авыр туфрагы җиңел булсын, диде ул.
