Гомере буе авылдашларының сәламәтлеге сагында торган акъәби 90 яшьлек олы юбилеен каршылады.
Вера әби тумышы белән Мордовия республикасыннан. Чувашиянең Алатыр медицина училищесында белем алганнан соң, ул махсус юллама белән Апас районының Ындырчы авылына эшкә килә. Бер сүз дә татарча белмәгән яшь кыз авыл халкы белән уртак тел табу өчен татар телен өйрәнүгә керешә.
“Татарча сүзләрне дәфтәргә язып алып, төннәр буе ятлап, исемдә калдырырга тырыша идем. Әнә шулай татар телен өйрәндем”, - дип искә ала ул.
Ындырчы авылында бер ел хезмәт иткәннән соң, Вера әбине Дүртөйле авылына фельдшер-акушер итеп билгелиләр. Белемле яшь белгечне авыл халкы бик җылы кабул итә. Өстәвенә ул тырышлыгы, уңганлыгы белән дә гаҗәпләндерә. Авылдашларын яшелчә, җиләк-җимеш үстерү серләренә өйрәтә.
“Бервакыт Чувашиядән килүчеләрдән күпләп кишер сатып алырга чират торган халыкны күреп, шаккаттым. Баксаң, бу якларда кишер үстермиләр икән. Орлыгын таба алмыйлар булып чыкты. Мин туган ягыма кайтып, күпләп кишер орлыклары алып килдем. Аларны күршеләргә, дусларга тараттым. Шуннан соң авыл халкы күпләп кишер чәчеп, уңыш җыеп ала башлады. Җиләк-җимеш агачлары үстерергә дә күндердем. Колхоз рәисе белән сөйләшеп, Арча якларыннан чия, алмагач үсентеләре алып кайтып, халыкка тараттык”, - дип сөйли акъәби.
Вера әби 47 ел буе Дүртөйле авылы халкының сәламәтлеге сагында тора. Бик күп хатын-кызларга сабыйларын дөньяга китерергә ярдәм итә. Лаеклы ялга чыккач та, ярдәм сорап килгән кешегә дәва бирергә тырыша. Авыл егете Ислам абый белән матур гаилә коралар. Ике кызга һәм бер егеткә гомер бүләк итеп, аларны да тырыш, хезмәт сөючән итеп үстерәләр. 50 елга якын парлы, тигез гомер кичерәләр.
Бүгенге көндә Вера әби кышкы озын көннәрне Апаста яшәүче кызы Гөлфинур гаиләсе янәшәсендә үткәрсә, ә җәйләрен исә туган йортына ашкынып кайта. Яшелчәләр үстерә, сөенеп-сөенеп үзе утырткан җиләк-җимеш агачларының уңышын җыя.
Акъәби 90 яшьлек гомер бәйрәмен дә туган нигезендә балалары, якыннары янәшәсендә каршылады. Бик күп котлаулар кабул итте. Олы гомер бәйрәме уңаеннан Вера әби Мозафаровага район Советы аппараты җитәкчесе Роза Нурмиева, Ишеево авылы җирлеге башлыгы Ринат Сатдинов изге теләкләрен юлладылар. Акъәбигә Ил башлыгының Котлау хаты, район башлыгының котлау открыткасы, истәлекле бүләк тапшырылды.
