Апас районында Ленинград камалышының тере шаһиты булган 2 кеше яши
Дүртиле авылында яшәүче Сария апа Сафина аларның берсе. Сария апа Бөек Җиңүнең 73 еллыгы уңаеннан район башлыгы исеменнән күчтәнәчләр алды. Район башкарма комитеты җитәкчесе урынбасары Луиза Сафина, Ишеево авыл җирлеге башлыгы Ринат Сатдинов Сария апаның хәлләрен сорашып, район башлыгының котлауларын җиткерделәр һәм изге теләкләрен юлладылар.
Сария апа ул елларны бик дулкынланып искә ала. 5 яшьлек сабый күңеленә шомлы еллар мәңгелеккә уелып калган.
–Тревога башлангач, кая качарга белмәдек. Ничек кирәк алай исән калып, безне тәрәзәсе дә булмаган терлек ташый торган вагоннарга утыртып озаттылар. Юл бик озак булды. Кайтып кергәндә, авылда берни дә юк иде. Әни авыл буйлап торыр урын эзләп, бер кечкенә генә йортка урнаштык. 4 бала үстек. Кыенлыкларны күп күрдек, – ди ветеран.
Сария апа почта ташыган, сөт җыйган, озак еллар мәктәптә эшләгән. Тормыш иптәше белән 5 бала тәрбияләп үстергәннәр. Бүгенге тормышка шөкер итеп яши ул. Күчтәнәчләр өчен дә кат-кат рәхмәтләрен ирештереп, из теләкләрен әйтеп калды.
