“Балаларга сугыш турында укыйбыз”

Самара өлкә балалар китапханәсе “Балаларга сугыш турында укыйбыз” исемле IXХалыкара акциясен үткәрү инициативасы белән чыккан иде. Әлеге акциянең максаты –сугыш чоры балалар әдәбияты  үрнәгендә кече һәм урта яшьтәге китап укучыларда патриотик хисләр тәрбияләү. Әлеге изге эштән безнең китапханә дә читтә калмады. Әйдәп баручы методист Шакирҗанова Илсөяр һәм әйдәп баручы библиограф Шамилова Альбина 2 “В” сыйныф укучыларына (укытучылары Нуриева Лилия Фидәил кызы) Бөек Ватан сугышының дәһшәтле мизгелләрен чагылдырган әдәби әсәрләрне укуны оештырдылар. Китап  укучылар Бөек Җиңүнең нинди көч һәм югалтулар белән яулануы, тылдагы авыр хезмәт, сугыш чоры балалары  тормышы турында белделәр. Утлы еллар рухында язылган хикәяләр һәм шигырьләр балалар йөрәгенә үтеп керде. Балаларга Муса Җәлилнең “Кызыл ромашка” шигыре, Нәби Дәүлинең “Яшәү белән үлем арасында” һәм Ибраһим Газинең “Малай белән эт” китапларыннан өзекләр укылды. Балаларның  әлеге тема белән  кызыксынуларын күрү иң күңеллесе булды.