Авыл китапханәләре өчен игелек марафоны

Февраль аеннан  «Авыл китапханәләре өчен игелек марафоны»/ «Марафон добра для сельских библиотек» Бөтенроссия  акциясе старт алды.  Акциянең партнерлары «Молодежка ОНФ», Стратегик ресурсларны саклауга ярдәм итү Милли фонды (Национальный фонд содействия защите стратегических ресурсов), Дәүләт һәм туган тел укытучылары ассоциациясе,  «Эксмо-АСТ» нәшрияты булдылар. Акциянең максаты – авыл китапханәләре фондын тулыландыру һәм регионнарда китап укуны пропагандалау. Быелгы марафон Бөек Җиңүнең 75 еллыгына багышлана.

Әлеге акция кысаларында, Россия Дәүләт думасы депутаты Равил Камил улы Хөснуллин ярдәме белән Татарстаныбызга, шул исәптән Сарман районына да китаплар кайтты. Районыбызның 32 авыл китапханәсе фондлары төрле   жанрдагы китаплар белән тулыланачак. Китаплар күп төрле: балалар әдәбияты, тарихи әсәрләр, дәреслекләр,  методик материаллар. Бу әсәрләрнең барысы да мәктәп программасына кертелгән. Китаплар арасында укыту һәм тәрбия эшендә ярдәмлекләр, дәреслекләр, буягычлар булуын да исәпкә алып, әлеге китапларның бер өлеше мәгариф учрежденияләренә дә тапшырылды.

Бүген тантаналы рәвештә китапларны Сарман муниципаль район Советының Аппарат җитәкчесе Фәндәс Вәлиев Сарман  гимназиясенә, Сарман урта мәктәбенә һәм Сарман авылында эшләп килүче дүрт балалар бакчасына бүләк итте. Үзәк китапханә дә  “Игелек марафоны”нан читтә калмады. Китапханәләр системасы директоры Роза Гайфуллина балалар бакчаларына китапханәгә хәйриячеләр тарафыннан бирелгән матур эчтәлекле китаплар тапшырды.

Бу китаплар лаеклы урынын, үз укучысын табар, китапханәгә килүчеләрдә кызыксыну тудырыр, яшь буынга патриотик тәрбия бирүдә зур ярдәм күрсәтер, дип ышанып калабыз, һәм матур гамәлләре белән һәркемгә үрнәк булып торучыларга чиксез рәхмәтебезне җиткерәбез!