Бөек Җиңүнең 75 еллыгы уңаеннан районыбызда ветераннар белән очрашулар оештырыла. Шундый зур бәйрәм Әтнә районы Олы Мәңгәр авылында узды.

Районыбызның "Мәңгәр" хуҗалыгы ашханәсендә сугыш чоры балаларын хөрмәтләделәр. Өлкәннәрне район башкарма комитеты җитәкчесе Айрат Каюмов, "Мәңгәр"  хуҗалыгы  рәисе Тәлгать Мостафин, авыл җирлеге башлыгы Фәнис Тәхавиев, "Изгелек" социаль ярдәм күрсәтү үзәге җитәкчесе Зөлфирә Сәләхиева котлады. Авыл китапханәчесе Гөлшат Гарифҗанова, авыл ветераннар советы рәисе Хәлимә Закирова оештырган әлеге чарада Мәңгәр үзешчәннәре, халык театры артистлары концерт куйды. Аш-су осталары тәмле ризыклар әзерләде. 46 ветеран хәтер яңартты.