Мәрвәр Каһирова Иске Кызылъяр авылында туып-үскән. Арчада шәфкать туташлары мәктәбен тәмамлагач хезмәт юлын Әгерҗе район хастаханәсендә башлый.

            Кайсы бүлеккә кушсалар, шунда үз эшен зур төгәллек белән башкаручы кызны рентген кабинеты ачылгач рентген-лаборант итеп билгелиләр. Әнә шулай, хастаханә тарихына ул беренче рентген-лаборант булып кереп кала. Шунда 25 ел хезмәт куйгач, хезмәт юлын балалар бакчасында дәвам итә. Тормыш иптәше Сәхәбетдин белән ике ул үстерәләр. Бүгенге көндә улы Радик белән яши.

            – Туганнардан бик уңдым. Резеда Закирова “җиңгәчәй” дип көнгә өчәр тапкыр килеп хәлебезне белә, эшләребездә булыша, – дип рәхмәтләр укып яши аңа һәм башка туганнарына Мәрвәр әби.

            Юбилее көнендә котлаган район башкарма комитеты җитәкчесе урынбасары Римма Гыйльметдиновага, халыкны социаль яклау идарәсе начальнигы Альмира Зариповага, рентгет-лаборант эшен аннан кабул итеп алган, һәрдаим аралашып, хәлен белеп яшәүче Рәмзия Шәймөхәммәтовага да рәхмәтләрен кат-кат әйтте хөрмәтле юбиляр.