Талибетдин Авзалутдин улы 1926 елның 21 мартында Әлмәт районы Кама-Исмәгыйль авылында крестьян гаиләсендә дөньяга килгән. Аның яшьлеге сугыш елларына туры килә: 1943 елның ноябрендә, 17 яшендә, ул фронтка китә. Бөек Ватан сугышының авыр юлларын үтеп, 1945 елга кадәр Ватан алдындагы бурычын намус белән үти.
Сугыштан соң Талибетдин Авзалутдин улы үз гомерен хезмәткә багышлый. 1955 елдан 1981 елга кадәр ул «Әлмәтнефть» НГДУсында эшли. Тракторчы һәм ЦКППН-1 цехында технологик насослар машинисты булып, нефть сәнәгате үсешенә зур өлеш кертә.
Сугыш кырларында күрсәткән батырлыгы өчен ул I дәрәҗә Ватан сугышы ордены һәм күпсанлы юбилей медальләре белән бүләкләнә. Без аны Ватанны саклаучы һәм намуслы хезмәт иясе буларак хөрмәт белән искә алабыз. Аның тормыш юлы — киләчәк буыннар өчен лаеклы үрнәк.
